Gidsel markahæstur á HM – Bjarki Már varð sjötti

Daninn Mathias Gidsel varð markakóngur heimsmeistaramótsins í handknattleik sem lauk í Stokkhólmi í gærkvöld. Gidsel skoraði 60 mörk í níu leikjum danska landsliðsins á mótinu, eða 6,66 mörk að jafnaði í leik.

Heimsmeistarar Dana eiga þrjá leikmenn á meðal tíu markahæstu. Danir áttu síðast markakóng á HM árið 2019 þegar Mikkel Hansen varð efstur á lista með 72 mörk.

Bjarki Már Elísson hafnaði í sjötta sæti þrátt fyrir að leika færri leiki en flestir aðrir á meðal tíu markahæstu leikmanna mótsins. Bjarki Már skoraði 45 mörk í sex leikjum, var 15 mörkum á eftir Gidsel sem lék þremur leikjum fleiri en Bjarki Már. Að jafnaði skoraði Bjarki Már 7,5 mörk í leik á mótinu.

Gidsel verður 24 ára gamall 8. febrúar. Honum skaut upp á stjörnuhimininn á HM 2021 í Egyptalandi eftir að hafa leikið sína fyrstu landsleiki haustið 2020. Gidsel er fæddur í Skjern á norðurhluta Jótlands og lék og æfði með liði félagsins fram til 15 ára aldur. Sumarið 2014 gekk Gidsel til liðs við akademíu GOG á Fjóni og lék sinn fyrsta leik með liði félagsins í dönsku úrvalsdeildinni þremur árum. Með GOG lék Gidsel fram á síðasta sumar þegar samningur hans við Füchse Berlin í Þýskalandi gekk í gildi.

Hér fyrir neðan er að finna skrá yfir tíu markahæstu leikmenn HM 2023.