Eftir erfiða byrjun í þýsku 1. deildinni í haust þá eru Arnar Freyr Arnarsson og liðsfélagar í MT Melsungen að sækja jafnt og þétt í sig veðrið. Melsungen vann góðan sigur á Stuttgart á útivelli í gær, 31:29. Melsungen-menn voru tveimur mörkum yfir í hálfleik, 16:14. Með sigrinum færðist Melsungen upp í 8. sæti af 18 liðum deildarinnar með sjö stig þegar sjö viðureignir eru að baki. Deildin er enn sem komið er nokkuð jöfn.
Arnar Freyr skoraði eitt mark en brást bogalistin í tveimur skotum. Honum var einu sinni vikið af leikvelli í tvær mínútur. Mohamed Amine Darmoul var markahæstur með átta mörk og heljarmennið Dainis Krištopāns var næstur með sjö mörk.
Kai Häfner hélt áfram að leika framúrskarndi vel fyrir Stuttgart. Gamli refurinn skoraði átta mörk og virðist engu líkara en að hann hafi gengið í gegnum endurnýjun lífdaga síðustu mánuði. Häfner hefur m.a. verið orðaður við endurkomu í þýska landsliðið. Torben Matzken skoraði einnig átta mörk.
- Stöðuna í þýsku 1. deildinni og í fleiri deildum evrópsks handknattleiks er að finna hér.
Vinsælt lesefni:
