Útlit er fyrir að stuðningsmenn íslenska landsliðsins í handknattleik karla geti ekki klæðst nýjum keppnistreyjum landsliðsins þegar heimsmeistaramótið hefst í næst viku. Þá kemur sér vel að eiga eldri treyjur þótt þær beri merki annars íþróttavöruframleiðanda. Treyjurnar hafa selst eins og heitar lummur á undanförnum árum, ekki síst meðan stórmót hafa staðið yfir.
Afskaplega leitt
Vísir hefur eftir Örvari Rudolfssyni hjá Sportmönnum, innflutningsaðila Adidas á Íslandi, að óvíst sé hvort nýju treyjurnar verða til sölu. Örvar getur engu lofað. „Það að treyjurnar séu ekki komnar er afskaplega leitt,“ segir Örvar í samtali við Vísir og vill ekkert segja um ástæðu þess að dráttur hafi orðið á sölu á treyjunum hér á landi. Örvar ber sig skiljanlega aumlega yfir stöðunni.
Engar treyjur voru til sölu fyrir Evrópumót kvenna í desember hvar íslenska landsliðið tók þátt né fyrir jólin en treyjurnar hafa verið vinsæl jólagjöf.
Salan komin úr höndum HSÍ
HSÍ samdi í haust við Adidas um búning fyrir landsliðin. Um leið lauk 20 ára samstafi við Kempa. Um leið hætti HSÍ beinni sölu á treyjum og öðrum klæðnaði tengdum landsliðinu og innlend sala færðist til Sportmanna, innflutningsaðila Adidas á Ísland. „Við erum stöðugt að pressa á svör frá Adidas,“ segir Róbert Geir Gíslason, framkvæmdastjóri HSÍ við Vísir en HSÍ hefur lagst á árar með Sportmönnum.
Einhver þúsund
Ekki hefur verið mögulegt að áætla fjölda þeirra Íslendinga sem keypt hafa ferðir til Zagreb og aðgöngumiða á mótið. Sumir hafa slegið á að Íslendingar geti verið um 2.000. Mikil sala hefur verið í ferðir á vegum Icelandair beint til höfuðborgar Króatíu.
Handbolti.is hefur notið stuðnings Icelandair undanfarna mánuði.
A-landslið karla – fréttasíða.
