Handknattleiksdeild Gróttu hefur skrifað undir samninga við Ólöfu Maríu Stefánsdóttur og Söru Xiao Reykdal til tveggja ára.
Ólöf María kemur frá ÍBV þar sem hún varð deildar- og bikarmeistari með liðinu í vor. Ólöf skoraði 9 mörk fyrir liðið á seinustu leiktíð. Hún er fjölhæfur leikmaður og virkilega öflugur varnarmaður.
Sara kemur til Gróttu frá Víkingi en hún lék 14 leiki með liðinu í Grill 66-deildinni í fyrra. Víkingur hafnaði þá í 6. sæti deildarinnar. Sara er uppalin í Fram en hún er markvörður.
„Það eru virkilega góðar fréttir að Ólöf og Sara hafi ákveðið að taka slaginn með okkur. Ólöf er virkilega sterkur varnarmaður sem getur leyst mörg hlutverk sóknarlega og er mikill karakter. Sara mun styrkja það góða markvarðarteymi sem fyrir var hjá félaginu. Ég vænti mikils af samstarfinu og hlakka til fyrsta leiks gegn Haukum,“ sagði Sigurjón Friðbjörn Björnsson þjálfari Gróttuliðsins í tilkynningu frá handknattleiksdeildinni.
Grótta leikur upphafsleik Grill 66-deildar kvenna í kvöld þegar liðið tekur á móti ungmennaliði Hauka í Hertzhöllinni á Seltjarnarnesi klukkan 18.
Leikjadagskrá Grill 66-deilda.
