Guðmundur Bragi er til reynslu í Þýskalandi

Guðmundur Bragi Ástþórsson leikmaður Hauka og U20 ára landsliðsins er til reynslu hjá þýska 1. deildarliðinu ASV Hamm-Westfalen þessa dagana. Hann lék með liðinu gegn Wetzlar á æfingamóti (Linden Cup) í gær og tekur þátt í tveimur næstu leikjum liðsins einnig eftir því sem næst verður komist.

Þetta kemur fram á heimasíðu ASV Hamm-Westfalen og eins á fréttavefnum handball-world í Þýskalandi.

Forráðamenn ASV Hamm-Westfalen leita logandi ljósi að leikstjórnanda eftir að Björn Zintel meiddist og verður lengi frá. Keppni hefst í þýsku 1. deildinni upp úr næstu mánaðamótum auk þess sem ASV Hamm-Westfalen leikur í bikarkeppninni eftir viku. Ef Guðmundur Bragi heillar forráðamenn liðsins má telja næsta víst að þeir tryggi sér starfskrafta Hafnfirðingsins tvítuga.

ASV Hamm-Westfalen fluttist upp í 1. deild í vor ásamt Gummersbach eftir að hafa hafnað í öðru sæti 2. deildarinnar. Lið félagsins hefur einu sinni áður leikið í efstu deild þýska hanknattleiksins, fyrir rúmum áratug og þá var stórskyttan Einar Hólmgeirsson í herbúðum liðsins.