Gummersbach vann vængbrotið lið MT Melsungen, 29:26, í fyrri viðureign liðanna í útsláttarkeppni Evrópudeildarinnar í handknattleik karla í Gummersbach í kvöld. Liðin mætast á ný eftir viku á heimavelli Melsungen. Samanlagður sigurvegari leikjanna tveggja tekur sæti í átta liða úrslitum og mætir það Bidasoa Irún.
Hvorki Arnar Freyr Arnarsson né Elvar Örn Jónsson voru með Melsungen að þessu sinni vegna meiðsla og raun er óvíst hvenær sá fyrrnefndi getur mætt til leiks. Fleiri leikmenn Melsungen er fjarri góðu gamni um þessar mundir. Aðeins 14 leikmenn voru á skýrslu hjá liðinu í leiknum.
Elliði Snær Viðarsson skoraði þrjú mörk fyrir Gummersbach. Teitur Örn Einarsson lék ekki með vegna meiðsla. Miro Schluroff var markahæstur með 10 mörk og Molis Vujovic var næstur með fjögur mörk eins og Julian Köster. Guðjón Valur Sigurðsson er þjálfari Gummersbach.
Lettinn Dainis Kristopans var atkvæðamestur hjá Melsungen með sjö mörk og Ian Barrufet var næstur með sex mörk.
Svissneska liðið HC Kriens-Luzern stendur vel að vígi eftir sjö marka sigur á Limoges frá Frakklandi, 36:29, í Stadthalle í Sursee í Sviss. Liðin eru einnig í útsláttarkeppni Evrópudeildarinnar.
