Györ krækti í síðasta sætið í átta liða úrslitum – þýsku meistararnir eru úr leik

Ungverska meistaraliðið Györ krækti í fjórða og síðasta sætið í átta liða úrslitum Meistaradeildar kvenna í handknattleik þegar lokaumferð riðlakeppninnar fór fram um helgina. Györ vann Esbjerg, 29:28, í Ungverjalandi á laugardaginn í uppgjöri liðanna um annað sæti riðilsins. Leikurinn var hnífjafn frá upphafi til enda.

Evrópumeistarar tveggja síðustu ára, Vipers Kristiandand, CSM Búkaresti, Metz og Györ sitja yfir í fyrstu umferð útsláttarkeppninnar og mæta til leiks í átta liða úrslitum.

Í fyrstu umferð útsláttarkeppninnar mætast:
Brest Bretagne – Esbjerg.
Krim – Rapid Búkaresti.
Storhamar – Odense.
Buducnost – FTC.

Fyrri umferðin fer fram laugardaginn 18. mars. Síðari leikirnir verða viku síðar. Samanlagður sigurvegari tekur sæti í átta liða úrslitum ásamt Vipers Kristiansand, CSM Búkaresti, Metz og Györ.

Sitja eftir með sárt ennið

Leikmenn þýska meistaraliðsins Bietigheim sitja eftir með sárt ennið. Þeir komast ekki í fyrstu umferð útsláttarkeppnina þrátt fyrir stórsigur á Banik Most, 47:25. Á sama tíma vann Krim frekar óvæntan sigur á rúmensku meisturunum, CSM Búkaresti, 28:26, í Ljubljana.

Brest, Krim og Bietigheim enduðu jöfn með 12 stig hvert í fimmta til sjöunda sæti A-riðils keppninnar. Þegar litið er til innbyrðisúrslita í leikjum liðanna þriggja stendur Bietigheim lakast að vígi og lendir þar með í sjöunda sæti. Tvö neðstu liðin í hvorum riðli eru úr leik.

Úrslit leikja helgarinnar og lokastaðan í riðlunum

A-riðill:
Brest – Vipers 29:36.
Bietigheim – Banik Most 47:25.
Krim – CSM Búkaresti 28:26.
Odense – FTC 25:28.

B-riðill:
Györ – Esbjerg 29:28.
Rapid Búkaresti – Lokomotiv Zagreb 27:22.
Storhamar – Metz 24:26.
Buducnost – Kastamonu 10:0.*

*Leikurinn fór ekki fram vegna jarðskjálftanna í Tyrklandi. Kastamonu er tyrkneskt félag.