Gleðidagur var í Þórshöfn í Færeyjum í gær þegar fyrsta skóflustungan var tekin að þjóðarhöll innanhússíþrótta í Hoyvík. Höllin hefur verið á stefnuskránni um nokkurt skeið en eftir að fjármögnun var tryggð í upphafi vetrar var hægt að taka til óspilltra málanna.
Til stendur að þjóðarhöll Færeyinga verði opnuð árið 2025 og leysir af Höllina á Hálsi sem fyrir löngu er orðin barn síns tíma.
Uppfyllir allar kröfur
Höllin á að rúma allt að 2.700 áhorfendur á handboltaleikjum og 4.600 áhorfendur á standandi viðburðum s.s. tónleikum. Hún á að uppfylla allar kröfur sem alþjóðleg íþróttasambönd gera til innanhúss íþrótta, s.s. til handknattleiks. Færeyingar þurftu um skeið áður en covid faraldurinn brast á að leika heimaleiki sína í handknattleik í Danmörku vegna ófullnægjandi aðstöðu heimafyrir.
Auk kappleikja og tónleika er gert ráð fyrir að húsið verði leigt út til ráðstefnu- og fundarhalds og vonast Færeyjar að höllin auðveldi þeim að færa út kvíarnar í þeim efnum.
Áætlaður byggingarkostnaður er ríflega fjórir milljarðar íslenskra króna. Borgarsjóður Þórshafnar greiðir ríflega helming en það sem eftir stendur kemur frá færeyska ríkinu en að stærstum hluta frá einkaaðilum.
Ötull borgarstjóri
Heðin Mortensen borgarstjóri Þórshafnar hefur verið ötull baráttumaður fyrir byggingu þjóðarhallarinnar. Hann hét leikmönnum U18 ára landsliðsins í handknattleik karla við komuna heim eftir sigur liðsins í B-hluta Evrópumóts sumarið 2021 að þeir skyldu aldrei leika heimaleiki sína utan heimalandsins. Hann virðist ætla að standa við þau orð sín.
