Norska stórstjarnan Sandor Sagosen segir að íþróttalegt umhverfi sé á allt öðru og hærra stigi hjá þýska meistaraliðinu THW Kiel en franska meistaraliðinu PSG í París. „Hjá PSG geldur handboltinn fyrir að vera íþrótt númer tvö á eftir fótboltanum. Í Kiel er handboltinn númer eitt og allt í kringum hann er eins og best verður á kosið,“ sagði Sagosen á dögunum.
Sagosen gekk til liðs við Kiel í sumar eftir þriggja ára veru hjá franska stórliðinu sem talið er vera það dýrasta í heiminum. Með PSG var Norðmaðurinn m.a. franskur meistari öll árin auk þess að vera einu sinni valinn handknattleiksmaður ársins í kjöri á vegum Alþjóða handknattleikssambandsins, IHF.
Sagosen, sem er 25 ára gamall, segir bernskudraum sinn rætast nú þegar hann sér fram á að leika í þýsku 1. deildinni í handknattleik. Hann er samningsbundinn THW Kiel næstu þrjú árin.
