Haraldur Þorvarðarson aðstoðarþjálfari meistaraflokks karla hjá Fram heldur ótrauður áfram að vinna fyrir félagið við hlið Einars Jónssonar þjálfara meistaraflokks karla. Fram segir frá því í dag að Haraldur hafi skrifað undir nýjan tveggja ára samning um að halda sínu striki.
Haraldur tók við sem aðstoðarþjálfari karlaliðs Fram fyrir tveimur árum þegar Einar kom að málum á nýjan leik. Áður hafði Haraldur getið sér gott orð sem þjálfari utan Fram og einnig sem röggsamur dómari, m.a. í efstu deildum. Auk þess lék Haraldur með Fram um árabil eftir að hann kom heim eftir atvinnumennsku í handknattleik í Þýskalandi.
Auk þess að vera aðstoðarþjálfari meistaraflokks karla hjá Fram þjálfar Haraldur yngri flokka.
„Hann er vel liðinn innan sem utan vallar hjá félaginu og því sönn ánægja að hann hafi áhuga að starfa með okkur áfram,“ segir m.a. í tilkynningu handknattleiksdeildar Fram.
