Handknattleikssamband Evrópu, EHF, hefur staðfest fyrri ákvörðun sína að úrslitahelgi Meistaradeildar karla, final4, fyrir árið 2020 fari fram í Lanxess-Arena í Köln dagana 28. og 29. desember nk. Leikjum undanúrslita og úrslita sem fram áttu að fara í byrjun júní var frestað vegna kórónuveikinnar.
Allir þeir sem hafa þegar keypt miða á viðburðinn í vor fá endurgreitt en fram kemur í tilkynningu EHF að aðeins þrjú prósent miðaeigenda hafi þegar óskað eftir endurgreiðslu. Stærstur hluti þeirra 20 þúsund miða sem voru til sölu var þegar seldur þegar leikjunum var frestað snemma vors. Hinsvegar munu þeir miðar sem þegar eru seldir ekki gilda. Eigendur miða eiga að skila þeim í gegnum hlekk sem er hér að neðan sem er einnig að finna á heimasíðu EHF, eurohandball.com.
https://ehffinal4.eurohandball.com/
Fljótlega verður opnað á ný fyrir miðasölu á úrslitahelgina í desember. Öllum núverandi miðaeigendum verður þá gefinn kostur á að kaupa miða á viðburðinn í desember í forsölu, segir í tilkynningu frá EHF. Ekki kemur fram hversu margir miðar verða til sölu á viðburðinn á milli jóla og nýars.
Liðin fjögur sem hafa tryggt sér sæti í undanúrslitum Meistaradeild karla 2020 eru: Barcelona, Paris Saint-Germain (PSG), THW Kiel og Telekom Veszprém HC.
