Haukur er frá æfingum vegna ökklameiðsla

Haukur Þrastarson, leikmaður pólsku meistaranna Vive Kielce og íslenska landsliðsins, hefur ekki jafnað sig eftir að hafa snúið sig á ökkla í viðureign Vive Kielce og Porto í Meistaradeild Evrópu í handknattleik 20. október. Haukur sagði við handbolta.is í morgun að hann hafi reynt að taka þátt í æfingu í gær en fljótlega orðið ljóst að hann þurfi lengri tíma til þess að jafna sig.

Haukur er hér á landi þessa daga vegna æfinga karlalandsliðsins en til stóð að hann tæki þátt. Þess í stað er Haukur í æfingum undir stjórn Jóns Birgis Guðmundssonar, sjúkraþjálfara á Selfossi sem einnig vinnur með landsliðinu. Sagði Haukur ævinlega gott að komast undir verndarvæng Jóns Birgis enda þekkjast þeir vel. Jón Birgir sá til að mynda um þjálfun Hauks fyrstu mánuðina eftir að Haukur sleit krossband fyrir um ári síðan.