- Auglýsing -
- Berglind Þorsteinsdóttir landsliðskona í handknattleik lék í fyrsta sinn á leiktíðinni með Fram í gær þegar liðið sótti ÍR heim í Skógarsel í 5. umferð Olísdeildar kvenna. Berglind er að jafna sig eftir að hafa gengist undir aðgerð á hné í sumar vegna þrálátra meiðsla. Leik ÍR og Fram lauk með jafntefli, 20:20.
- Ólafur Gústafsson tók þátt í sínum fyrsta leik með FH í Olísdeild karla á þessu tímabili þegar FH mætti Fjölni í Kaplakrika. Ólafur gekk til liðs við FH í sumar, 13 árum eftir að hann kvaddi félagið og hélt út til Evrópu í atvinnumennsku, fyrst í Þýskalandi og síðar í Danmörku. Til stóð að Ólafur yrði með FH frá fyrsta leik Olísdeildar en meiðsli í hné settu strik í áformin.
- Ungur handknattleiksmaður Aftureldingar, Gísli Rúnar Jóhannsson, hefur verið lánaður til Fjölnis í Olísdeild karla út keppnistímabilið. Gísli Rúnar var í fyrsta sinn í hóp Fjölnis í gærkvöld gegn FH í Kaplakrika. Gísli Rúnar gekk til liðs við Aftureldingu fyrir tveimur árum frá Haukum.
- Elvar Þór Ólafsson leikmaður Fjölnis var ekki með liðinu í gærkvöld fremur en í síðustu leikjum þegar Fjölnir sótti FH heim og tapaði með sjö marka munm 25:18. Elvar Þór meiddist á öxl í leik Fjölnis og ÍBV í lok september. Elvar Örn sagði við handbolta.is á dögunum að vonir standi til að hann verði ekki lengi frá keppni til viðbótar.
Staðan og næstu leikir í Olísdeildum.
- Auglýsing -
