„Hann hefur haft samband við mig og beðið mig afsökunar á þessum skrifum sínum. Hann er maður að meiri að hafa beðist afsökunar og þar með er málinu lokið að minni hálfu,” segir Gunnar Magnússon leikgreinandi króatíska landsliðsins í handknattleik karla og þjálfari Aftureldingar í samtali við Vísir spurður hvort hann hafi verið í samskiptum við Víði Sigurðsson blaðamann Morgunblaðsins vegna skrifa Víðis í síðustu viku.
Víðir sagði m.a. í pistli sínum að hann skildi ekkert í Gunnari að svíkja land og þjóð.
Eins árs samstarf
Gunnar hefur verið leikgreinandi króatíska landsliðsins undanfarið ár eftir að Dagur Sigurðsson tók við þjálfun króatíska landsliðsins.
„Ég skil ekkert í honum að svíkja land og þjóð á þennan hátt og afhenda mótherjum Íslands innanhúsupplýsingar um íslenska liðið,“ segir meðal annars í greininni sem birt var nokkrum dögum eftir að Króatar unnu Íslendinga á heimsmeistaramótinu í Zagreb Arena.
„Vissulega er handbolti bara leikur. En yrðum við sátt ef fyrrverandi aðstoðarmaður utanríkisráðherra myndi gera úttekt á varnarmálum Íslands fyrir óvinveitta þjóð? Ég er ekki viss um það,“ skrifaði Víðir einnig. Víðir er engin nýgræðingur í blaðamennsku.
Skrifin slógu Gunnar
Gunnar segir í samtali við Vísir að skrif Víðis hafi slegið sig. „Ég var mjög hissa þegar ég sá þessa grein enda ekki oft sem það er verið að bendla menn við landráð á sviði íþrótta,“ segir Gunnar.
Grein Víðis kallaði á sterk viðbrögð og voru þau víða harðlega gagnrýnd m.a. í snarpri grein hins þrautreynda blaðamanns Sigmundar Ó. Steinarssonar á handbolti.is.
