Markvörðurinn Brynjar Vignir Sigurjónsson var í fyrsta sinn í leikmannahópi HK í gærkvöld. Brynjar Vignir gekk til liðs við HK í sumar frá Aftureldingu en meiddist í æfingaleik um miðjan ágúst og hefur verið frá síðan. Um var að ræða erfitt ristarbrot á afar viðkvæmu svæði.
Brynjar Vignir mætti til leiks í mark HK þegar á leið síðari hálfleiks í viðureigninni við Val sem HK tapaði með níu marka mun, 33:24.
Fleiri góðar fréttir af leikmannamálum eru í herbúðum HK þessa dagana. Aron Dagur Pálsson er, eins og Brynjar Vignir, kominn á ferðina aftur eftir meiðsli. Aron Dagur var öðru sinni í leikmannahópi HK á keppnistímabilinu í gærkvöld gegn gömlum samherjum úr Val.
Aron Dagur og Brynjar Vignir eiga vafalaust eftir að styrkja HK-liðið þegar þeir verða komnir í betra leikform þegar á tímabilið líður.
Staðan og næstu leikir í Olísdeildum.
