Íslenska landsliðið vann annan stórsigur á heimsmeistaramótinu í handknattleik í dag þegar það lagði Sádi Araba með 16 marka mun, 43:27, í annarri umferð riðlakeppni heimsmeistaramótsins í handknattleik 19 ára landsliða karla í Kaíró. Staðan að loknum fyrri hálfleik var 22:11.
Með sigrinum tryggði íslenska liðið sér sæti í millirðili 16 efstu liða mótsins. Næsti leikur verður gegn Brasilíu á laugardaginn. Flautað verður til leiks klukkan 12. Til þess að vera öruggt um að taka með tvö stig inn í milliriðil verður íslenska liðið að vinna leikinn á laugardaginn því óvíst er hvaða lið fylgir með áfram úr riðlinum yfir í milliriðla.
Íslenska landsliðið gerði út um leikinn í fyrri hálfleik með því að skoraði átta mörk í röð og breyta stöðunni úr 7:5 í 15:5. Vörnin var öflug og hraðaupphlaup fylgdu í kjölfarið.
Í síðari hálfleik losnaði aðeins um varnarleikinn þega Sádar tóku sig til of fóru í sjö manna sóknarleik. Það kom reyndar í bakið á þeim því íslensku piltarnir skoruðu átta sinnum í autt mark Sáda, þar af skoraði Sigurjón Bragi Atlason markvörður fimm sinnum og var með 100% skotnýtingu.
Allir leikmenn íslenska liðsins eru skráðir fyrir marki að Jens Sigurðarsyni markverði undanskildum. Jens kom aðeins við sögu í einu vítakasti en hann með magakveisu í morgun eins og tveir aðrir leikmenn liðsins.
Mörk Íslands: Stefán Magni Hjartarson 7, Ágúst Guðmundsson 6/1, Sigurjón Bragi Atlason 5, Dagur Árni Heimisson 5, Bessi Teitsson 3, Elís Þór Aðalsteinsson 3, Marel Baldvinsson 3, Dagur Leó Fannarsson 2/1, Daníel Montoro 2, Jens Bragi Bergþórsson 2, Andri Erlingsson 1, Gardar Ingi Sindrason 1, Haukur Guðmundsson 1, Hrafn Þorbjarnarson 1, Ingvar Dagur Gunnarsson 1.
Varin skot: Sigurjón Bragi Atlason 6, 18% – Jens Sigurðarson 0.
HM19-’25: riðlakeppni, úrslit og staðan
Handbolti.is fylgist með leiknum í textalýsingu hér fyrir neðan.
