Íslenska landsliðið í handknattleik karla, skipað leikmönnum 19 ára og yngri, tapaði fyrir Svíum, 41:36, í Rijeka í Króatíu í dag í viðureign liðanna á heimsmeistaramótinu. Íslenska liðið leikur þar með ekki um forsetabikarinn, 17. sætið, á morgun heldur kemur það í hlut Svía og Marokkóbúa. Marokkó vann Svartfjalland eftir vítakeppni, 30:28.
Ísland mætir Svartfjallalandi í viðureign um 19. sætið klukkan 15.30 á morgun.
Íslenska liðið var marki yfir í hálfleik, 21:20, og skoraði fyrsta markið í síðari hálfleik. Eftir það tók sænska liðið völdin á og skoraði 11 mörk gegn fimm á 11 mínútna kafla og náði fimm marka forskoti sem mest varð sex mörk. Sóknarleikur íslenska liðsins hikstaði. Svíar færðu sér það í nyt og skoruðu talsvert af mörkum eftir hröð upphlaup.
Íslensku piltarnir náðu að koma til baka og minnka muninn í tvö mörk, 32:34, og áttu sókn til þess að koma forskoti Svía niður í eitt mark. Það tókst ekki og forskot Svía jókst á nýja leik.
Mörk Íslands: Reynir Þór Stefánsson 9, Eiður Rafn Valsson 8, Össur Haraldsson 8, Elmar Erlingsson 3, Kjartan Þór Júlíusson 2, Haukur Ingi Hauksson 1, Hinrik Hugi Heiðarsson 1, Ívar Bessi Viðarsson 1, Þorvaldur Örn Þorvaldsson 1.
Varin skot: Ísak Steinsson 6, 20% – Breki Hrafn Árnason 3/1, 16%.
HMU19: Dagskrá og úrslit síðustu leikja mótsins
Handbolti.is fylgdist með leiknum í textalýsingu hér fyrir neðan.
