„Mér líður bara mjög vel. Það segir sig sjálft. Ég er ánægður með leik liðsins í 60 mínútur í kvöld. Að einhverju leyti líkur leikur og gegn Slóvenum, hart tekist á, góður varnarleikur og markvarsla. Við náðum annarri góðri frammistöðu sem er mjög mikilvægt,“ segir Snorri Steinn Guðjónsson landsliðsþjálfari í handknattleik karla í samtali við handbolta.is í Zagreb Arena í kvöld eftir sigurinn á Egyptum, 27:24.
„Ég er hrikalega ánægður með einbeitingu og kraftinn í strákunum,“ sagði Snorri Steinn ennfremur. „Auðvitað er eitt og annað sem betur má fara en það virðist sem stemningin og ákefðin sem er í hópnum um þessar mundir henti okkur vel,“ sagði Snorri Steinn og undirstrikaði þroskamerkið á liðinu að halda forskoti frá upphafi til enda tvo leiki í röð.
Snorri Steinn segir að framundan sé þriðji úrslitaleikurinn í röð á föstudaginn gegn Króötum sem Dagur Sigurðsson þjálfar. Alltaf sé erfitt að mæta heimaliði á stórmóti, ekki síst Króötum í þessu tilfelli sem hafi á að skipa frábæru liði með framúrskarandi þjálfara.
Lengra viðtal er við Snorra Stein hér fyrir ofan.
