Jóhannes Berg Andrason handknattleiksmaður Íslandsmeistara FH er sagður vera undir smásjá forráðamanna sænska handknattleiksliðsins IFK Kristianstad en þeir hafa góða reynslu að íslenskum handknattleiksmönnum í gegnum tíðina. Frá áhuga félagsins er sagt í Kristianstadbladet í dag.
Samkvæmt heimildum handbolta.is mun áhugi forráðamanna IFK Kristianstad ekki vera nýr af nálinni. Þeir spurðust fyrst um örvhentu skyttuna allt frá því síðla á síðasta ári.
Þrátt fyrir meintan áhuga herma heimildir ennfremur að engar viðræður hafi átt sér stað né eigi sér stað um þessar mundir á milli sænska liðsins og FH eða Jóhannesar Berg.
Einar Bragi Aðalsteinsson, sem lék með Jóhannesi Berg hjá FH, í tvö ár gekk til liðs við IFK Kristianstad í sumar eftir að hafa orðið Íslandsmeistari með FH.
Keppni í sænsku úrvalsdeildinni hefst snemma í næsta mánuði en þegar hefur verið flautað til leiks í bikarkeppninni. IFK vann Vinslövs HK á miðvikudagskvöldið, 32:27. Einar Bragi skoraði tvö mörk í leiknum.
