Íslenska landsliðið í handknattleik kvenna hefur tryggt sér þátttökurétt í umspilsleikjum sem fram fara í apríl en í þeim verður bitist um keppnisrétt á heimsmeistaramótinu sem fram fer í desember á næsta ári í Danmörku, Noregi og Svíþjóð.
Ísland vann Ísrael öðru sinni í forkeppni HM á Ásvöllum í dag, 33:24. Samanlagt vann íslenska liðið 67:50 í leikjunum tveimur.
Dregið verður í umspilsleikina eftir Evrópumót kvenna sem nú stendur yfir í Slóveníu, Svartfjallalandi og Norður Makedóníu og lýkur 20. nóvember. Í pottunum fyrir dráttinn í umspilinu verða sigurlið forkeppninnar sem lýkur í dag og drýgstur hluti þeirra liða sem taka þátt í EM.
Ísland var þremur mörkum yfir í hálfleik, 17:14. Minnstur varð munurinn tvö mörk um miðjan síðari hálfleik. Þá skipti íslenska liðið yfir í 5/1 vörn. Við henni átti ísraelska liðið ekkert svar.
Mörk Íslands: Andrea Jacobsen 7, Sandra Erlingsdóttir 6/2, Rut Arnfjörð Jónsdóttir 3, Steinunn Björnsdóttir 3, Thea Imani Sturludóttir 3, Perla Ruth Albertsdóttir 2, Rakel Sara Elvarsdóttir 2, Þórey Rósa Stefánsdóttir 2, Lilja Ágústsdóttir 1, Díana Dögg Magnúsdóttir 1, Sunna Jónsdóttir 1.
Varin skot: Hafdís Renötudóttir 11/1, 33,3% – Sara Sif Helgadóttir 3, 50%.
Handbolti.is fylgdist með leiknum í textalýsingu hér fyrir neðan.
