Júlíus Þórir Stefánsson sem tók tímabundið við þjálfun Olísdeildarliðs Gróttu í handknattleik kvenna í byrjun nóvember hefur verið ráðinn þjálfari liðsins til næstu þriggja ára. Tilkynnti Grótta um ráðninguna í gærkvöld. Áður hafði Sigurjón Friðbjörn Björnsson þjálfað Gróttuliðið í hálft annað ár og m.a. stýrt því til sigurs í umspili um sæti í Olísdeildinni í vor sem leið.
Júlíusi Þóri verður til halds og trausts Davíð Örn Hlöðversson sem verið hefur aðstoðarþjálfari karlaliðs Gróttu undanfarin þrjú tímabilin. Hann heldur áfram hjá karlaliðinu samhliða starfi sínu hjá kvennaliði Gróttu.
Júlíus Þórir lék í Olísdeild karla um árabil með Gróttu, Aftureldingu og Val.
Næsti leikur Gróttu, sem rekur lestina í Olísdeildinni, verður gegn Haukum annað kvöld í Hertzhöllinni á Seltjarnarnesi.
Viðtal við Júlíus Þóri eftir leikinn við Fram á síðasta laugardag:
