Katla María og félagar eru langefstar

Katla María Magnúsdóttir og liðsfélagar í Holstebro Håndbold tóku upp þráðinn í gær eftir nærri tveggja mánaða hlé frá kappleikjum í næstefstu deild danska handknattleiksins. Þær unnu AGF Håndbold, 24:18, á heimavelli og sitja áfram í efsta sæti deildarinnar með 22 stig eftir 11 leiki. AGF er næst á eftir með 16 stig eins og Roskilde Håndbold.

Katla María skoraði fjögur mörk í leiknum, tvö þeirra úr vítaköstum. Hún var ein fjögurra leikmanna liðsins sem skoruðu fjögur mörk í leiknum.

Katla María gekk til liðs við Holstebro Håndbold á liðnu sumri. Hún hefur skorað 43 mörk í 11 leikjum fram til þessa.