- Auglýsing -
- Jannik Kohlbacher, línumaðurinn sterki hjá Rhein-Neckar Löwen og þýska landsliðinu er meiddur á hægri olnboga og óttast Martin Schwalb, þjálfari liðsins, að Kohlbacher gæti orðið frá keppni um skeið og þar af leiðandi misst af fyrstu leikjum liðsins í þýsku úrvalsdeildinni sem hefst eftir hálfan mánuð. Fyrir eru á meiðslalista liðsins Alexander Petersson, Mikael Appelgren, Albin Lagergren, Mait Patrail og Jesper Nielsen. Schwalb reiknar með að þeir verði allir klárir í slaginn þegar deildarkeppnin byrjar. Enginn þeirra var með um síðustu helgi þegar Löwen lék til úrslita á sex liða móti og vann Balingen í úrslitaleik.
- Hörður Fannar Sigþórsson skoraði tvö mörk þegar lið hans KÍF steinlá fyrir Team Klaksvik, 22:16, á heimavelli, íþróttahöllinni í Kollafirði, í færeysku úrvalsdeildinni í handknattleik í gærkvöld. KÍF er þar með án stiga eftir tvær umferðir.
- Birta Rún Grétarsdóttir skoraði eitt mark fyrir Oppsal sem tapaði með 12 marka mun á útivelli fyrir Noregsmeisturum Vipers Kristiansand í norsku úrvalsdeildinni í gærkvöld. Birta Rún er eina íslenska konan sem leikur í norsku úrvalsdeildinni um þessar mundir. Oppsal hefur ekki gengið sem skildi til þessa og rekur lestina án stiga eftir þrjár umferðir.
- Fresta varð fyrsta heimaleik Íslendingaliðsins Volda í norsku B-deild kvenna í gær. Upp kom grunur um smit innan liðs Ålgård sem til stóð að sækti lið Volda heim. Halldór Stefán Haraldsson er þjálfari Volda, Hilmar Guðlaugsson er aðstoðarþjálfari og Sara Dögg Hjaltadóttir leikur með liðinu.
- Auglýsing -
