Íslensku landsliðskonurnar Andrea Jacobsen, Díana Dögg Magnúsdóttir og Elín Rósa Magnúsdóttir, koma heim til móts við landsliðið með sigurbros á vör eftir sjötta sigur Blomberg-Lippe í dag í þýsku 1. deildinni. Blomberg-Lippe vann öruggan sigur á Sport-Union Neckarsulm, 29:20, á heimavelli eftir að hafa verið þremur mörkum yfir þegar fyrri hálfleikur var að baki, 13:10.
Blomberg-Lippe hefur þar með 12 stig þegar sex viðureignum er lokið. HSG Bensheim/Auerbach er í öðru sæti fjórum stigum á eftir en á reyndar leik til góða. HSG Bensheim/Auerbach átti að sækja TuS Metzingen heim í dag en viðureigninni var slegið á frest. Sport-Union Neckarsulm er í þriðja sæti með sex stig eins og Borussia Dortmund sem lagði SV Union Halle-Neustadt örugglega í dag, 41:29.
Elín Rósa skoraði tvö mörk í dag og gaf fjórar stoðsendingar, skapaði eitt marktækifæri og vann einn ruðning í vörninni.
Andrea skoraði tvö mörk og átti einnig tvær stoðsendingar og var auk þess með eitt skapað færi. Andrea gekk svo vasklega fram í sókninni að einum leikmanni Sport-Union Neckarsulm var vikið af leikvelli fyrir að leggja stein í götu hennar. Einnig vann Andrea eitt frákast í vörninni.
Díana Dögg skoraði eitt mark, átti þrjár stoðsendingar auk eins skapaðst færi. Hún varði tvö skot í vörninni og nappaði boltanum af liði Sport-Union Neckarsulm í eitt skipti.
Á heimleið
Nú tekur við hlé hjá Blomberg-Lippe vegna landsleikja sem framundan eru. Landsliðskonur flykkjast til landsliða sinna, þar á meðal þær íslensku sem koma til landsins annað kvöld. Á mánudaginn hefur landsliðið undirbúning sinn fyrir leikinn við Færeyjar í 1. umferð undankeppni EM 2026 sem fram fer í Lambhagahöllinni á miðvikudagskvöld.
Miðasala á landsleik Íslands og Færeyja.
