Aftureldingarmenn slá ekki slöku við á kjördag frekar en aðra daga. Þeir tilkynntu undir kvöld að samið hafi verið línumanninn Kristján Ottó Hjálmsson. Hann kemur til félagsins frá HK í Kópavogi hvar hann hefur leikið fram til þessa.
Kristján Ottó er 25 ára línumaður sem hefur leikið með HK allan sinn feril fyrir utan nokkurra mánaða lánsdvöl hjá Haukum árið 2019. Hann hefur verið í lykilhlutverki hjá HK undanfarin ár í bæði vörn og sókn og var í vetur næst markahæsti leikmaður HK liðsins sem hélt sér uppi í Olísdeildinni í vor þar sem hann skoraði 78 mörk í 22 leikjum.
„Kristján Ottó er baráttuglaður leikmaður sem hefur undanfarin ár verið vaxandi í sínum leik og sannað sig sem öflugur leikmaður í Olísdeildinni. Við tökum vel á móti Kristjáni Ottó í Mosó sem er frábær viðbót í okkar öfluga hóp á komandi keppnistímabili,“ segir m.a. í tilkynningu handknattleiksdeildar Aftureldingar sem greindi frá komu Færeyinganna Sveinur Ólafsson og Hallur Arason í gær.
Eftir því sem handbolti.is kemst næst á Kristján Ottó m.a. að fylla skarð Jakobs Aronssonar sem gengur á ný til liðs við uppeldisfélag sitt, Hauka, eftir lánsdvöl hjá Aftureldingu.
