Landsliðskonurnar Andrea Jacobsen og Díana Dögg Magnúsdóttir fögnuðu sínum fyrsta sigri með Blomberg-Lippe í þýsku 1. deildinni í handknattleik þegar liðið lagði TSV Bayer 04 Leverkusen, 25:16, á heimavelli í annarri umferð deildarinnar. Blomberg Lippe var þremur mörkum yfir í hálfleik, 13:10. Í síðari hálfleik réði liðið lögum og lofum og gesirnir frá Leverkusen komust lítt áleiðis.
Andrea og Díana Dögg komu talsvert við sögu í leiknum sem einnig er sá fyrsti hjá Blomberg-Lippe á heimavelli á keppnistímabilinu.
Díana Dögg skoraði þrjú mörk og gaf fimm stoðsendingar, var með þrjú sköpuð færi og vann þrjú vítaköst.
Andrea skoraði eitt mark og átti þrjár stoðsendingar, eitt skapað færi, stal boltanum einu sinni og var einu sinni vikið af leikvelli.
Andrea og Díana Dögg gengu til liðs við Blomberg-Lippe í sumar. Næsti leikur Blomberg-Lippe verður gegn Borussia Dortmund í Sporthalle Wellinghofen, heimavelli Borussia eftir viku.
