Lífið er jafnt og þétt að færast í fyrra horf hjá Roland Eradze, aðstoðarþjálfara úkraínska meistaraliðsins Motor í Zaporozhye eftir að hann, allir leikmenn liðsins og aðalþjálfarinn Savykynas Gintaras veiktust af kórnónuveirunni fyrir nærri þremur vikum. Roland fór í skimun fyrir helgina og eftir niðurstöður af henni var honum frjálst að hefja vinnu á nýjan leik.
Savykynas Gintaras var laus úr eingangrun einum degi á undan Roland.
„Við byrjuðum æfingar í gær,“ sagði Roland í skilaboðum til handbolta.is í morgun. Enn eru fimm leikmenn liðsins á veikindalista en vel á annan tug hefur jafnað sig og getur hafið æfingar.
Roland sagði að rólega væri farið af stað við æfingar næstu daga og enn myndu líða tvær vikur þangað til Motor-liðið leikur næsti í deildarkeppninni í Úkraínu. Ástandið þar í landi væri slæmt eins og víða í Evrópu. Hinsvegar væri framundan leikur við Celje Lasko í Meistaradeild Evrópu í Slóveníu á miðvikudagskvöld.
„Menn verða ekki í sínu besta leikformi á miðvikudaginn en við munum gera okkar besta,“ sagði Roland Eradze, aðstoðarþjálfari Motor í Zaporozhye í Úkraínu við handbolta.is í morgun.
