Ekki tókst Söndru Erlingsdóttur og samherjum hennar í TuS Metzingen að vinna hið ægisterka meistaralið Bietigheim í undanúrslitum þýsku bikarkeppninnar í dag. Bietigheim hafði nokkra yfirburði og vann með 10 marka mun í undanúrslitaleik í Porsche-Arena í Stuttgart, 39:29. Sjö mörk skildu liðin að þegar fyrri hálfleikur var að baki, 21:14.
Sandra og félagar leika um bronsverðlaunin á morgun við Oldenburg. Bensheim/Auerbach vann Oldenburg, 31:26, í hinni viðureign undanúrslita.
Í stuttu máli sagt þá áttu leikmenn TuS Metzingen ekki möguleika í lið Bietigheim að þessu sinni. Sandra skoraði eitt mark og átti þrjár stoðsendingar. Stórleikur Magda Balsam, samherja Söndru, dugði skammt. Hún skoraði ellefu mörk. Julia Maidhof skoraði sex mörk fyrir Bietigheim.
Þar með heldur sigurganga Bietigheim áfram en liðið hefur unnið bikarkeppnina tvö undangengin ár.
