Unglingalandsliðsmaðurinn Marel Baldvinsson hefur skrifað undir þriggja ára samning við Fram. Marel, sem er aðeins 17 ára gamall, er uppalinn hjá Fram og hefur skarað fram úr með yngri flokkum félagsins. Hann átti stóran þátt í sigri U-liðs Fram í Grill-deildinni á nýliðnum vetri og lék einnig með meistaraflokki Fram á síðari hluta tímabilsins. Þá hefur hann einnig átt sæti í landsliðum yngri flokka, nú síðast í U-18 ára landsliði.
„Marel er einn af þeim leikmönnum sem hafa náð góðum árangri með yngri flokkum Fram og er í dag einn af okkar efnilegustu leikmönnum. Hann kom óvænt inn í meistaraflokk félagsins í vetur og stóð sig frábærlega vel. Það verður gaman að fylgjast með Marel á næstu árum og sjá hann leggja sitt af mörkum hjá okkar góða félagi,“ er haft eftir Einari Jónssyni þjálfara karlaliðs Fram í tilkynningu.
