Arnar Freyr Arnarsson fagnaði sigri með MT Melsungen eftir hörkuleik við Gummersbach í þýsku 1. deildinni í handknattleik í kvöld, 26:25. Með sigrinum nær MT Melsungen að halda aðeins við efstu lið deildarinnar verandi í fjórða sæti með 25 stig, fimm stigum færra en Magdeburg og Fücshe Berlin sem tróna á toppnum.
Arnar Freyr skoraði tvö mörk í leiknum í Rothenbach-Halle í Kassel auk þess að taka virkan þátt í vararleiknum. Elvar Örn Jónsson lék ekki með Melsungen vegna meiðsla.
Elliði Snær Viðarsson skoraði þrjú mörk fyrir Gummersbach. Guðjón Valur Sigurðsson þjálfar liðið sem er í sjöunda sæti. Stöðun í deildinni er að finna neðst í greininni.
Stórleikur Viggós nægði ekki
Stórleikur Viggós Kristjánssonar nægði ekki Leipzig til sigurs í heimsókn til Wetzlar. Hann skoraði níu mörk og gaf eina stoðsendingu í þriggja marka tapi, 30:27. Franz Semper var næstur með sjö mörk. Andri Már Rúnarsson skoraði ekki fyrir Leipzig að þessu sinni. Rúnar Sigtryggsson er þjálfari Leipzigliðsins sem er um miðja deild.
Tap í Mannheim
Manuel Zehnder markahæsti leikmaður þýsku 1. deildarinnar skoraði sigurmark Eisenach, 27:26 á Rhein-Neckar Löwen í SAP Arena í Mannheim. Ýmir Örn Gíslason skoraði eitt mark fyrir Rhein-Neckar Löwen en Arnór Snær Óskarsson var ekki á meðal þeirra sem skoraði að þessu sinni.
Bergischer HC tapaði í heimsókn sinni til Göppingen í suður hluta Þýskalands, 31:28. Arnór Þór Gunnnarsson er aðstoðarþjálfari Bergischer.
Heiðmar Felixson og liðsmenn Hannover-Burgdorf töpuðu illa fyrir THW Kiel, 34:20, Wunderino Arena í Kiel. Heiðmar er aðstoðarþjálfari Burgdorf.
Ein umferð er eftir í þýsku 1. deildinni fyrir jól. Leikirnir fara fram á föstudag og á laugardag.
Staðan:
