„Ég hef nokkrum sinnum áður verið fyrirliði í einstökum verkefnum en verð núna fyrirliði í fyrsta sinn á stórmóti. Það er mikill heiður,“ segir Ómar Ingi Magnússon sem tekur við fyrirliðastöðunni af Aroni Pálmarssyni sem lagt hefur skóna á hilluna eftir nokkur ár sem leiðtogi landsliðsins. Ómar Ingi er 28 ára gamall leikmaður SC Magdeburg og einn fremsti handknattleiksmaður heims um þessar mundir. Níu ár eru síðan Ómar Ingi var fyrst með íslenska landsliðinu á stórmóti. Hann missti af HM fyrir ári vegna meiðsla.
Með aukinni reynslu
Ómar Ingi segir markmið landsliðsins vera skýrt eins og áður, að ná eins langt og kostur er. „Með aukinni reynslu hefur það orðið mönnum ljósara að það þarf mikið til þess að allt gangi upp á stórmóti en við erum tilbúnir að láta á það reyna,“ segir Ómar Ingi.
„Ákveðinn kjarni hefur verið saman í landsliðinu um árabil. Aron [Pálmarsson] er að vísu hættur en þá er pláss fyrir aðra leikmenn að taka að sér stærra hlutverk. Kjarninn hefur verið þéttur saman í nokkur ár, eitthvað sem getur hjálpað okkur,“ segir Ómar Ingi Magnússon, fyrirliði orðvar að vanda.
