- Auglýsing -
- Aron Pálmarsson skoraði fjögur mörk og átti þrjár stoðsendingar þegar Aalborg Håndbold vann 10. leik sinn í dönsku úrvalsdeildinni í gærkvöld, 26:23, í heimsókn til Holstebro. Simon Gade markvörður Aalborg átti stórleik, var með 40% hlutfallsmarkvörslu. Arnór Atlason er aðstoðarþjálfari Aalborg sem er efst í deildinni með 21 stig eftir 11 leiki. Halldór Jóhann Sigfússon er aðstoðarþjálfari Holstebro-liðsins sem er í áttunda sæti með 11 stig, einnig eftir 11 leiki.
- Raunir Midtjylland halda áfram í dönsku úrvalsdeildinni í handknattleik karla. Liðið tapaði 11. leiknum í gærkvöd í heimsókn til Nordsjælland og er enn án stiga.
- Klavs Bruun Jørgensen þjálfara SønderjyskE, sem leikur í dönsku úrvalsdeildinni í karlaflokki, var sagt upp störfum í gær. Hann tók við fyrir ári þegar Jan Pytlick var leystur frá störfum. SønderjyskE er í 10. sæti dönsku úrvalsdeildarinnar um þessar mundir með sex stig af 20 mögulegum. Jørgensen er fyrrverandi landsliðsmaður Dana í handknattleik, þjálfaði um skeið kvennalandsliðið og var þar einnig forveri fyrrgreinds Pytlick.
- Þýski landsliðs- og hornamaðurinn Marcel Schiller meiddist í leik með Göppingen gegn Leipzig á sunnudaginn. Hann leikur ekki fleiri leiki með Göppingen það sem eftir lifir árs. Óvíst er ennþá hvort meiðslin hafi áhrif á hugsanlega þátttöku hans á heimsmeistaramótinu með þýska landsliðinu.
- Harma van Kreij skytta í hollenska liðinu tekur ekki meira þátt í Evrópumótinu í handknattleik. Hún meiddist í hné í viðureign Hollands og Norður Makedóníu í annarri umferð C-riðils í fyrrakvöld.
- Auglýsing -
