- Auglýsing -
- Benedikt Gunnar Óskarsson var markahæstur Íslendinganna fjögurra hjá Kolstad þegar liðið vann neðsta lið norsku úrvalsdeildarinnar, Haslum, 35:18, á heimavelli í gær þegar næst síðasta umferð hófst.
- Benedikt Gunnar skoraði sex mörk gaf fimm stoðsendingar. Sigvaldi Björn Guðjónsson og Sveinn Jóhannsson skoruðu tvö mörk hvor og Arnór Snær Óskarsson skoraði eitt mark og gaf þrjár stoðsendingar.
- Kolstad fór í efsta sæti deildarinnar með sigrinum. Elverum sem var efst á leik til góða við Nærbø á morgun.
- Arnar Birkir Hálfdánsson og félagar í Amo HK standa vel að vígi eftir tvo sigurleiki á Vinslövs í umspili um sæti í sænsku úrvalsdeildinni á næstu leiktíð. Amo vann aðra viðureignina á heimavelli í gær, 31:26, og þarf einn sigur í viðbót til þess að tryggja sér áframhaldandi veru í deildinni. Arnar Birkir skoraði tvö mörk í leiknum.
- Dana Björg Guðmundsdóttir skoraði átta mörk í sex marka sigri Volda á Aker Topphåndball, 26:20, á útivelli í gær. Þegar ein umferð er eftir í næsta efstu deild norska handknattleiksins í kvennaflokki eru Volda og Fjellhammer jöfn að stigum, með 45 stig hvort. Eitt lið fer beint upp og sem stendur er Volda í betri stöðu vegna innbyrðis úrslita. Volda og Fjellhammer mætast í lokaumferðinni á heimavelli Volda á sunnudaginn.
- Janus Daði Smárason og félagar í Pick Szeged töpuðu fyrir ETO, 35:33, á útivelli í ungversku 1. deildinni í handknattleik í gær. Janus Daði skoraði fjögur mörk í leiknum. Pick Szeged er nú sex stigum á eftir One Veszprém sem er efst en aðeins einu stigi á undan FTC (Ferencváros). Sex umferðir eru eftir af deildarkeppninni og ljóst að leikmenn Pick Szeged verða að halda vel á spöðunum á endasprettinum til þess að mæta One Veszprém í úrslitaleikjum um meistaratitilinn.
- Auglýsing -
