- Auglýsing -
- Einar Þorsteinn Ólafsson, landsliðsmaður í handknattleik, er þessa dagana með nýjum samherjum sínum í þýska 1. deildarliðinu HSV Hamburg við æfingar á Fuerteventura, einni af Kanaríeyjum. Fuerteventura er næststærsta eyjan í klasanum á eftir Tenerife. Þar búa Einar Þorsteinn og félagar sig undir næsta keppnistímabil af miklum móð.
- Einar Þorsteinn kom til HSV Hamburg í sumar frá Fredericia HK í Danmörku eftir þriggja ára dvöl.
- Pascal Hens fyrrverandi landsliðsmaður Þýskalands og núverandi sérfræðingur þýsku sjónvarpsveitunnar Dyn telur að SC DHfK Leipzig og Eisenach geti lent í miklum vanda og barist um að forðast fall á næstu leiktíð í þýsku 1. deildinni. Keppni í deildinni hefst eftir mánuð. Bæði liði hafi misst öfluga leikmenn á síðustu vikum og mánuðum sem gæti reynst liðunum dýrt þegar upp verður staðið.
- Christian Köhle, formaður stjórnar þýska meistaraliðsins HB Ludwigsburg, segir að stjórnendur rói lífróður þessa daga við að halda liðinu gangandi eftir að rekstrarfélagið fór fram á gjaldþrotaskipti í síðustu viku og eins handbolti.is hefur sagt frá í nokkrum fréttum síðustu daga. Hefur Köhle m.a. auglýst eftir fyrirtækjum sem til eru að styðja við bakið á HB Ludwigsburg. Félagið verður að svara Handknattleikssambandi Evrópu í síðasta lagi í dag hvort það hafi fjárhagslega burði til þess að halda úti liði í Meistaradeild Evrópu á komandi leiktíð.
- Katar, eitt auðugasta ríki heims, ætlar að sækja um að halda Ólympíuleikana 2036 og verða þar með fyrsta ríki Mið-Austurlanda til þess að halda leikana. Katar hefur á undanförnum 15 árum haldið mörg stórmót, m.a. HM karla í knattspyrnu og handknattleik, HM í sundi, frjálsíþróttum og fimleikum. Aðstaða fyrir flestar íþróttir er fyrir hendi.
- Þjóðverjar hafa lengi velt fyrir sér að sækja um Ólympíuleikana 2036 en nokkur andstaða er í landinu vegna þess að margir óttast að það verði vatn á myllu þeirra sem halda uppi merkjum nasista.
- Auglýsing -
