- Auglýsing -
- Göppingen staðfesti í gærkvöld að Gunnar Steinn Jónsson hafi skrifað undir samning við félagið sem gildir til loka júní. Fyrr í gær hafði Ribe-Esbjerg greint frá því að Gunnar hafi kvatt félagið eftir þriggja ára veru og væri á leið til Þýskalands. Gunnari er ætlað að hlaupa í skarðið fyrir Janus Daða Smárason sem verður frá keppni fram á sumar eftir aðgerð á öxl á dögunum.
- Gunnar Steinn hefur leikið erlendis í 12 ár hjá Drott og Kristianstad í Svíþjóð, Nantes í Frakklandi og Gummersbach í Þýskalandi auk Ribe-Esbjerg. Gunnar er 33 ára gamall og á að baki 42 landsleiki.
- Línumaðurinn Þorvaldur Tryggvason hefur skrifað undir nýjan tveggja ára samning við Fram. Hann kom til Safamýrarliðins á síðasta sumri frá Fjölni.
- Þýski landsliðsmarkvörðurinn Johannes Bitter gengur til liðs við sitt gamla félag, HSV Hamburg, í sumar eftir fimm ára veru hjá Stuttgart. Bitter lék árum saman með HSV Hamburg en liðið stefnir hraðbyri upp í 1. deild ásamt Gummersbach sem Guðjón Valur Sigurðsson þjálfar. Liðin eru í tveimur efstu sætum deildarinnar og hafa nokkurt forskot á önnur lið í 2. deild um þessar mundir.
- Handknattleikskonurnar Malin Aune og Emilie Arntzen hafa ákveðið að yfirgefa norska meistaraliðið Vipers Kristiansand í sumar og ganga til liðs við CSM Búkarest.
- Auglýsing -
