- Auglýsing -
- Harpa María Friðgeirsdóttir var næst markahæst með átta mörk þegar lið hennar, TMS Ringsted, tapaði fyrir DHG, 40:31, í næst efstu deild danska handknattleiksins í gær. Leikið var í Ringsted. Harpa María og franska handknattleikskonan Alexandra Lacrabere voru allt í öllu hjá Ringsted-liðinu. Sú franska skoraði 11 mörk, þar af fimm úr vítaköstum. Ringsted er í 9. sæti af 12 liðum með fjögur stig í fimm leikjum.
- Kristján Örn Kristjánsson, Donni, var ekki á meðal þeirra sem skoraði mark fyrir Skanderborg AGF í gær þegar liðið tapaði fyrir SönderjyskE, 32:25, á útivelli í 9. umferð dönsku úrvalsdeildarinnar í handknattleik. Donni átti eina stoðsendingu en markskot hans geiguðu að þessu sinni. Skanderborg AGF er í 9. sæti deildarinnar af 14 liðum.
- Þau óvæntu úrslit átti sér stað í gær að meistarar Aalborg Håndbold náðu aðeins jafntefli á heimavelli, 29:29, gegn Skjern sem er 10. sæti og hefur lítt náð sér á strik fram til þessa. Þar með getur lið Guðmundar Þórðar Guðmundssonar, Fredericia HK, náð öðru sæti annað kvöld ef það vinnur neðsta lið deildarinnar, Grindsted, á heimavelli.
- Phil Döhler átti skínandi góðan leik fyrir HF Karlskrona í gær þegar það gerði jafntefli við Alingsås, 28:28, á heimavelli í sænsku úrvalsdeildinni. Döhler varði 12 skot, 34,3%. Dagur Sverrir Kristjánsson var í leikmannahópi Karlskrona en átti ekki markskot. Nöfn Ólafs Andrésar Guðmundssonar og Þorgils Jóns Svölu Baldurssonar var ekki að finna í leikskýrslu í leikmannahópi Karlskrona sem er í þriðja sæti deildarinnar með 11 stig eins og IFK Kristianstad. Karlskrona á leik til góða.
- Stöðuna í sænsku úrvalsdeildinni og í fleiri deildum evrópsks handknattleiks er að finna hér.
- Vilborg Pétursdóttir var ekki á meðal þeirra sem skoruðu fyrir AIK í tveggja marka tapi liðsins fyrir OV Helsingborg HK, 19:17, á heimavelli í gær í Allsvenskan, næst efstu deild sænska handknattleiksins. AIK er í áttunda sæti með fimm stig að loknum sex leikjum.
- Bjarki Finnbogason skoraði einu sinni í öðrum leik sínum í röð með Anderstorps SK í sjö marka tapi fyrir Tyresö Handball, 33:26, í karladeild Allsvenskan í gær. Anderstorps SK rekur lestina í deildinni með þrjú stig eftir átta leiki.
- Auglýsing -
