- Auglýsing -
- Tite Kalandadze fyrrverandi stórskytta og leikmaður Stjörnunnar og ÍBV er í þjálfarateymi landsliðs Georgíu sem tryggði sér á laugardaginn sæti á Evrópumeistaramótinu í handknattleik sem fram fer í Þýskalandi í janúar. Þetta verður í fyrsta sinn sem Georgía á landslið í lokakeppni Evrópumóts karla í handknattleik. Kalandadze varð m.a. bikarmeistari með Stjörnunni 2007 og 2008.
- Georgíumaðurinn Giorgi Tskhovrebadze varð markahæstur í undankeppni Evrópumóts landsliða sem lauk á laugardaginn. Tskhovrebadze skoraði 42 mörk í sex leikjum. Finninn Max Granlund, Hollendingurinn Kay Smits og Úkraínumaðurinn Ihor Turchenko voru næstir á eftir með 40 mörk hver.
- Bjarki Már Elísson varð markahæstur Íslendinga í undankeppninni. Bjarki Már skoraði 33 mörk og hafnaði í níunda sæti listans ásamt Austurríkismanninum Nykola Bilyk og Ungverjanum Miklos Rosta.
- Færeyingar sem tryggðu sér á glæsilegan hátt sæti í lokakeppni EM í fyrsta sinn í sögunni áttu fimmta markahæsta leikmann undankeppninnar, Hákun West av Teigum. Hornamaðurinn eldfljóti skoraði 39 mörk.
- Auglýsing -
