- Auglýsing -
- Norski landsliðsmarkvörðurinn Katrine Lunde er á leið á sínu fjórðu Ólympíuleika síðar í þessum mánuði. Hún segir leikana verða þá síðustu á ferlinum. Lunde er 41 árs gömul og hefur leikið 307 landsleiki hefur margoft unnið til verðlauna með norska landsliðinu á stórmótum á ferlinum auk þess að vinna eitt og annað með félagsliðum sínum í gegnum tíðina. Lunde segir það hafa verið toppinn á félagsliðaferli sínum að vinna Meistaradeild Evrópu í vor með Vipers Kristiansund.
- Aron Kristjánsson og lærisveinar hans í landsliði Barein höfðu betur gegn landsliði Eistlands, 26:25, í öðrum vináttuleiknum til undirbúnings vegna þátttöku landsliðs Barein fyrir Ólympíuleikana. Leikurinn fór fram í gær. Á laugardaginn vann Barein örugglega, 36:25, eins og handbolti.is hefur áður greint frá. Þriðji leikur liðanna verður um miðja vikuna en allir fara þeir fram í Barein.
- Barcelona staðfesti í gær orðróm sem hefur verið uppi mánuðum saman um að Melvyn Richardson verði leikmaður félagsins á næsta keppnistímabili. Richardson kemur til félagsins frá Montpellier. Hann er sonur Jackson Richardson sem gerði garðinn frægan á handboltavellinum á tíunda áratug síðustu aldar og var m.a. eitt helsta tromp franska landsliðsins þegar það varð heimsmeistari í fyrsta sinn á Íslandi 1995.
- Mohamed Darmoul, 23 ára gamall miðjumaður frá Túnis, er á leið til GWD Minden ef marka má fréttir handball-arabic. Darmoul þótti standa sig afar með landsliði Túnis á HM í Egyptalandi í ársbyrjun.
- Danska handknattleikskonan Melanie Bak hefur kvatt Byåsen í Noregi og samið við rúmenska liðið SCM Craiova. Bogdan Burcea fyrrverandi landsliðsþjálfari Rúmeníu, er nú við stjórnvölin á SCM Craiova
- Auglýsing -
