- Auglýsing -
- Kristján Örn Kristjánsson, Donni, skoraði fjögur mörk í sjö skotum þegar PAUC vann Saint-Raphaël, 29:26, í efstu deild franska handknattleiksins í gærkvöld. Þetta var fimmti leikur Donna og samherja í deildinni á leiktíðinni og jafnframt sá fimmti á útivelli. Af leikjunum fimm hafa þeir unnið fjóra en tapað einum. PAUC er í sjöunda sæti deildarinnar en erfitt að átta sig almennilega á stöðunni því liðin hafa leikið misjafnlega marga leiki.
- Norska kvennalandsliðið í handknattleik vann það danska, 27:25, í fyrri vináttuleik þeirra í undirbúningi fyrir EM í handknattleik. Leikið var í Vejle á Jótlandi. Liðin mætast aftur á sama stað í kvöld. Rikke Iversen og Mia Rej skoruðu fjögur mörk hvor fyrir danska liðið og voru þær markahæstar. Camilla Herrem var markahæst í norska liðinu með átta mörk.
- Danir voru með yfirhöndina í leiknum frá upphafi og þar til á síðustu mínútunum að norska liðið stakk sér fram úr og vann.
- Hollenska landsliðskonan Bo van Wetering gengur til liðs við Odense Håndbold á næsta sumri. Hún hefur skrifað undir þriggja ára samning. Wetering er 21 gömul og leikur í vinstra horni. Hún var í sigurliði Hollands á HM fyrir ári síðan. Um þessar mundir er Wetering liðsmaður Tus Metzingen í þýsku 1.deildinni. Hún verður með hollenska landsliðinu í á Evrópumótinu sem hefst annan fimmtudag í Danmörku.
- Norski landsliðsmaðurinn Christoffer Rambo hefur ákveðið að kveðja þýska boltann næsta vor eftir átta leiktíðir og flytja heim til Noregs. Rambo leikur nú með GWD Minden. Hann hefur samið við Runar í Sanderfjord. Rambo á að baki 93 landsleiki.
- Auglýsing -
