- Auglýsing -
- Skarphéðinn Ívar Einarsson og Dagur Árni Heimisson hafa skrifað undir nýja tveggja ára samninga við handknattleiksdeild KA. Skarphéðinn er ný orðinn 17 ára og kom inn í meistaraflokkslið KA á síðustu leiktíð. Hann var í U18 ára landsliðinu sem lék á EM í Svartfjallalandi í síðasta mánuði.
- Dagur Árni er 16 ára gamall leikstjórnandi og hefur mikla og góða yfirsýn auk þess að vera góður skotmaður. Hann hefur ekki langt að sækja hæfileikana. Foreldrar Dags Árna eru Martha Hermannsdóttir og Heimir Örn Árnason, þrautreynt handknattleiksfólk.
- Orri Freyr Þorkelsson skoraði eitt mark þegar Noregsmeistarar Elverum hófu titilvörnina í gær á útivelli með sigri á Nærbø, 31:27, eftir að hafa verið þremur mörkum yfir að loknum fyrri hálfleik, 18:15.
- Aron Pálmarsson var fjarverandi vegna meiðsla þegar Aalborg Håndbold vann Nordsjælland, 39:32, í fyrstu umferð dönsku úrvalsdeildarinnar í gær. Leikið var á heimavelli Álaborgarliðsins. Leiksins verður einna helst minnst fyrir að Mikkel Hansen lék sinn fyrsta leik með dönsku félagsliði í rúm 10 ár eða síðan AG København sigldi sinn sjó sumarið 2012. Hansen kom sá og sigraði í leiknum, skoraði fjögur mörk fyrir Aalborg og átti eina stoðsendingu. Arnór Atlason er aðstoðarþjálfari Aalborg.
- Ýmir Örn Gíslason og samherjar í Rhein-Neckar Löwen unnu Melsungen, 36:25, í 1. umferð þýsku 1. deildarinnar á heimavelli í gærkvöld. Ýmir Örn skoraði ekki mark í leiknum en lét til sín taka í sterkri vörn liðsins en var einu sinni vísað af leikvelli. Arnar Freyr Arnarsson skoraði eitt mark fyrir Melsungenliðið. Löwen var sjö mörkum yfir að loknum fyrri hálfleik, 18:11. Elvar Örn Jónsson er að jafna sig af erfiðum meiðslum eins og kom fram á handbolti.is í gær.
- Auglýsing -
