- Auglýsing -
- Þórey Rósa Stefánsdóttir leikur sinn 120. A-landsleik fyrir Ísland í dag þegar íslenska landsliðið mætir Ungverjum á Ásvöllum í fyrri umferð umspilskeppninnar um sæti á HM. Flautað verður til leiks klukkan 16. Þórey Rósa er leikreyndasti leikmaður landsliðsins um þessar mundir. Næst á eftir er Rut Arnfjörð Jónsdóttir með 113 leiki. Hrafnhildur Ósk Skúladóttir er leikjahæsta landsliðskonan frá upphafi með 160 landsleiki.
- Rúmenarnir Radu Iliescu og Doru Manea dæma landsleikinn á Ásvöllum í dag sem hefst klukkan 16. Lettinn Ilmars Kazinieks verður eftirlitsmaður.
- Hannes Jón Jónsson þjálfari Alpla Hard mátti bíta í það súra epli í gær að tapa naumlega fyrir Aron Fivers, 24:23, í næst síðustu umferð austurrísku 1. deildarinnar í handknattleik. Hard situr i fjórða sæti deildarinnar og mætir væntanlega liði Ferlach í fyrstu umferð úrslitakeppninnar. Síðasta umferð deildarkeppninnar fer fram föstudaginn 14. apríl.
- Gríðarlegur áhugi var á meðal stuðningsmanna rúmenska liðsins Rapid Búkarest fyrir heimaleik liðsins við Evrópumeistara Vipers í átta liða úrslitum Meistaradeildar Evrópu í kvennaflokki sem fram fer í rúmensku höfuðborginni sunnudaginn 30. apríl. Nokkur þúsund miðar voru nánast rifnir úr á liðlega 20 mínútum þegar sala þeirra hófst á dögunum. „Ég er vissum að við gætum selt tutttugu þúsund miða á leikinn ef húsrúm leyfði,“ er haft eftir forseta Rapid en félagið hefur komið mjög á óvart í Meistaradeildinni á sínu fyrsta keppnistímabili.
- Bosníski handknattleiksmaðurinn Alen Ovcina hefur verið dæmdur í fjögurra ára keppnisbann eftir að hafa fallið á lyfjaprófi sem hann gekkst undir að loknum leik Bosníu og Slóveníu í undankeppni EM 13. desember. M.a. fundust merki um notkun á anabólískum sterum í sýni sem Ovcina skilaði af sér. Hann er sagður ekki eiga sér neinar málsbætur og leikur ekki handknattleik næstu fjögur ár.
- Auglýsing -