- Auglýsing -
- Færeyingurinn Óli Mittún tryggði Sävehof sigur á Lugi, 30:29, í heimsókn til Lundar í gærkvöld. Tryggvi Þórisson skoraði tvö af mörkum Sävehof sem komst upp að hlið Kristianstad með 30 stig í efsta sæti sænsku úrvalsdeildarinnar með þessum sigri. Kristianstad á leik til góða gegn Ásgeiri Snæ Vignissyni og samherjum í Helsingborg í kvöld.
- Bjarni Ófeigur Valdimarsson skoraði fimm mörk og átti þrjár stoðsendingar þegar IFK Skövde kom heim með annað stigið úr heimsókn til IF Hallby HK í sænsku úrvalsdeildinni í handknattleik karla í gærkvöld, 29:29. Skövde var þremur mörkum yfir í hálfleik, 15:12. Bjarni Ófeigur kom Skövde yfir, 29:28, þegar 33 sekúndur voru til leiksloka. Albin Broman tókst að jafna metin á síðustu sekúndum. Skövde situr í sjöunda sæti með 16 stig eftir 18 leiki.
- Íslendingatríóið hjá Skara HF tapaði í heimsókn sinni til VästeråsIrsta HF sænsku úrvalsdeildinni í handknattleik í gærkvöld í síðasta leik ársins, 26:21. Aldís Ásta Heimisdóttir skoraði fjögur mörk fyrir Skara-liðið, Jóhanna Margrét Sigurðardóttir eitt en Ásdís Guðmundsdóttir náði ekki að skora að þessu sinni. VästeråsIrsta HF var með átta marka forskot að loknum fyrri hálfleik, 18:10. Skara situr í áttunda sæti af 12 liðum deildarinnar með átta stig eftir 11 leiki. VästeråsIrsta HF er í þriðja sæti átta stigum á eftir Sävehof sem trónir á toppnum.
- Esbjerg og Nykøbing Falster komust í gærkvöld í undanúrslit í dönsku bikarkeppninni í kvennaflokki. Esbjerg lagði København Håndbold, 32:27, á sama tíma og Nykøbing lagði Viborg, 34:27, eftir að hafa verið marki undir í hálfleik, 15:14. Síðari tvær viðureignirnar verða í kvöld. Silkeborg-Voel mætir Aarhus United og Ikast tekur á móti Danmerkurmeisturum tveggja síðustu ára, Odense Håndbold.
- Auglýsing -
