Rífandi góð stemning var í Origohöll Valsmanna á Hlíðarenda í gærkvöldi þegar Valur hóf þátttöku í Evrópdeildinni í handknattleik karla með sigri á ungverska liðinu FTC (Ferencvárosi Torna Club), 43:39, í stórskemmtilegum leik.
Nærri 800 áhorfendum skemmtu sér hið besta í glæsilegri umgjörð keppnishallarinnar sem tugir sjálfboðaliða unnu hörðum höndum að koma upp og sáu um að allt færi eins vel fram og mögulegt var.
Heiðursgestur var Guðni Th. Jóhannesson forseti Íslands. Hann heilsaði upp á leikmenn, þjálfara, dómara og eftirlitsmann fyrir leik.
Hafliði Breiðfjörð ljósmyndari myndaði leikinn fyrir handbolta.is. Hann fangaði stemninguna utan vallar sem innan. Í fyrri syrpu Hafliða frá leiknum, sem birt er á handbolta.is í dag, beinist linsa hans að áhorfendum sem tóku ríkan þátt í leiknum frá upphafi og kórónuðu frábæra umgjörð leiksins sem var Val til mikils sóma.
Næsti heimaleikur Vals verður við Flenburg þriðjudagin 22. nóvember. Í milltiðinni fer Valur til Spánar og mætir BM Benidorm á næsta þriðjudagskvöld.
Smella má á myndirnar til þess að sjá þær stærri.
