Myndir: Hituðu upp í sól og 25 gráðum í Berlín

Nokkrir tugir Íslendinga komu saman í Prater Beer Garden skammt frá Max Schmeling Halle í Berlín í dag þar sem hitað var upp í glaðasólskini og 25 gráðu hita fyrir leik Íslands og Ungverjalands í átta liða úrslitum heimsmeistaramóts karla í handknattleik, skipað leikmönnum 21 árs og yngri.

Talið er að hátt í 100 Íslendingar verði á leiknum og fjölgaði þeim í gær og morgun þegar nokkrir komu með næturflugi til þýsku höfuðborgarinnar.

Handbolti.is staldraði í skamma stund meðal Íslendinganna sem voru kátir og glaðir að vanda enda er maður ævinlega manns gaman, ekki síst í góðu veðri.

Viðureign Íslands og Ungverjalands hefst klukkan 13.30 og verður textalýsing á handbolti.is beint af vettvangi.