Kannski var tíðindamaður handbolti.is sá eini sem klóraði sér í skallanum þegar dæmt var vítakast á Val og Theu Imani Sturludóttur leikmanni liðsins var vikið af leikvelli með rautt spjald nokkrum sekúndum áður en viðureign Vals og ÍR í Olísdeild kvenna lauk í gærkvöld. Thea Imani hafði rétt áður jafnað metin fyrir Val úr hraðaupphlaupi, 24:24.
Á myndskeiði hér fyrir neðan sést skýrt af hverju Theu var vikið af leikvelli með rautt spjald og ÍR vann vítakast sem Sara Dögg Hjaltadóttir skoraði sigurmarkið úr, 25:24.
Á myndskeiðinu, sem er úr annarri myndavél spiideo úr N1-höllinni á Hlíðarenda en þeirri sem sent var út úr í beinni út sendingu Handboltapassans, sést að Thea Imani hljóp inn í sendingaleið ÍR-liðsins og hindraði þar með að ÍR gæti hafi leik við miðju. Það má ekki, gildir einu hvort um óviljaverk er að ræða eða ekki. Boltinn strýkst í Theu á leiðinni að miðjunni.
