Aron Kristjánsson og liðsmenn hans í landsliði Barein töpuðu með minnsta mun í kvöld fyrir Argentínu, 26:25, í lokaumferð H-riðils í Zagreb Arena í kvöld. Argentína verður þar með andstæðingur Íslands í milliriðli ásamt Egyptalandi og Króatíu.
Egyptar lögðu Króata í kvöld, 28:24 og fara með fullt hús stiga.
Barein tapaði öllum leikjum sínum H-riðli. Fyrirfram var vitað að á brattan yrði að sækja hjá liðinu og að öllum líkindum myndu örlögin ráðast í viðureigninni við Argentínu. Bareinar lentu fimm mörkum undir þegar í fyrri hálfleik, 16:11. Þeir reyndu hvað þeir gátu í síðari hálfleik en höfðu ekki erindi sem erfiði.
Bareinar verða í riðli tvö í keppninni um forsetabikarinn ásamt Bandaríkjunum úf E-riðli auk neðsta liðsins úr F-riðli, Chile eða Japan, og liðsins sem rekur lestina í G-riðli, Grænhöfðaeyjar eða Kúba.
Leikið verður í forsetabikarnum, sæti 25 til 32, í Poreč í Króatíu. Leikdagar verða 22., 24. og 26. janúar auk sætisleikja 28. janúar.
Fyrsti leikur Barein verður gegn Grænhöfðaeyjum eða Kúbu.
Pólverjar í forsetabikarinn
Í hinum riðli forsetabikarsins leika Pólland, sem tapaði fyrir Sviss í lokaumferð A-riðils í dag, 30:28, Alsír, Gína og Kúveit. Fyrstu leikir verða þriðjudaginn 21. janúar.
Niðurstaðan veldur Pólverjum gríðarlegum vonbrigðum. Þeir reka lestina í A-riðli. Þýskaland fer hinsvegar áfram í milliriðil með fjögur stig, Sviss og Tékkland með eitt stig hvort.
