Þess var minnst í gær að um þessar mundir eru 60 ár liðin frá því að íslenska landsliðið í handknattleik kvenna varð Norðurlandameistari á fyrsta Norðurlandamótinu sem haldið var hér á landi í handknattleik. Ellefu af 15 leikmönnum Norðurlandameistaraliðsins mættu á Laugardalsvöll í gær og gengu inn á leikvöllinn með Sigríði Sigurðardóttur fyrirliða fremsta í flokki undir lófaklappi ásamt þjálfara sínum, Pétri Bjarnasyni.
Íslenska landsliðið vann þrjá leiki á mótinu, Svía 5:4, Finna 14:5, og Norðmenn 9:7. Fyrsta leiknum á mótinu, við Dani, lauk með jafntefli 8:8. Sigurinn kom á óvart vegna þess að á þessum tíma var danska landsliðið ógnarsterkt og hafði m.a. unnið silfurverðlaun á HM 1963.
Fyrstu leikir í fjögur ár
Ísland hafnaði í öðru sæti á Norðurlandamótinu 1960 en hafði frá þeim tíma ekki leikið einn landsleik þegar kom að Norðurlandamótinu í Reykjavík fjórum árum síðar. Sex af 15 leikmönnum íslenska landsliðsins á NM 1964 voru í landsliðinu á NM fjórum árum áður. Hópurinn var þar af leiðandi mikið breyttur og lítt reyndur í alþjóðlegri keppni.
Vandaður undirbúningur
Vandað var til undirbúnings íslenska landsliðsins eins og kostur var á. Mikið var lagt í æfingar auk þess sem farið var út úr bænum í æfingabúðir. Þegar að mótinu kom gistu leikmenn saman í stað þess að fara hver til síns heima.
Fjögur þúsund áhorfendur
Fjögur þúsund áhorfendur mættu á Laugardalsvöll síðasta keppnisdag Norðurlandamótsins sem var stærsta verkefni sem Handknattleikssamband Íslands hafði tekið að sér á þeim sjö árum sem liðin voru frá stofnun þess. Mikil gleði ríkti þegar Norðurlandameistaratitillinn var í höfn og voru íslensku landsliðskonurnar og þjálfari kölluð hvað eftir annað fram á leikvöllinn.
Aldrei verið önnur eins stemning
„Aldrei hefur önnur eins „stemmning“ verið við lok eins móts og í gærkvöld á Laugardalsvellinum. Hinir yfirleitt þöglu áhorfendur hér slitu af sér öll bönd hins hljóðláta borgara og tjáðu gleði sína með langvarandi hrópum,“ segir í frásögn Þjóðviljans að lokum Norðurlandamótsins. „Þetta var ógleymanleg stund fyrir íslenzkan handknattleik.“
Um kvöldið bauð Gylfi Þ. Gíslason menntamálaráðherra öllum þátttakendum Norðurlandamótsins til kvöldverðar þar sem hann afhenti Sigríði Sigurðardóttur fyrirliða bikarinn sem Sigríður er með á myndinni efst í þessari grein og hélt á þegar hún gekk inn á Laugardalsvöll í gær í fylgd Rögnvalds Erlingssonar dómara og sjá má á myndskeiðinu efst í fréttinni.
