Nýju landsliðstreyjurnar í handknattleik sem áttu að vera í sölu í Kristianstad í dag og í kvöld verða því miður ekki á boðstólum á samkomu stuðningsmanna íslenska landsliðsins fyrir leikinn á heimsmeistaramótinu við Portúgal eins og til stóð.
Í tilkynningu frá Handknattleikssambandi Íslands kemur fram að treyjurnar verði ekki í Kristianstad í tíma áður en flautað verður til leiks. Afgreiðslutöfum hjá framleiðandi treyjanna er um kennt. Ennfremur segir að allt verði lagt í sölurnar til að treyjurnar verði komnar til Kristianstad áður kemur að leiknum við Ungverja á laugardaginn.
„Verið er að reyna gera allt til að treyjurnar verði komnar fyrir annan leik liðsins á laugardag,“ segir orðrétt í tilkynningu HSÍ.
Nokkar eldri treyjur verða til sölu á Fan zone fyrir utan keppnishöllina í Kristianstad þar sem reiknað er með að a.m.k. eitt þúsund stuðningsmenn íslenska landsliðsins komi saman áður en flautað verður til leiks við Portúgal.
Landsliðstreyjurnar komu í sölu í vefverslun HSÍ rúmri viku fyrir jól og seldust upp. Fór salan fram úr öllum vonum enda voru þær svo gott sem rifnar út.
