Óðinn fór hamförum er hann varð bikarmeistari annað árið í röð

Óðinn Þór Ríkharðsson lék við hvern sinn fingur í kvöld og leiddi Kadetten Schaffhausen til sigurs í bikarkeppninni í handknattleik í Sviss annað árið í röð. Óðinn Þór skoraði 11 mörk í 12 skotum og var yfirburðamaður á vellinum í þriggja marka sigri Kadetten á Pfadi Winterhur, 29:26, í úrslitaleik í Pilatus Arena í Luzern.

Fjögur af 11 mörkum sínum skoraði Óðinn Þór úr vítaköstum.

Kadetten var þremur mörkum yfir að loknum fyrri hálfleik, 14:11.

Þetta var í ellefta sinn sem Kadetten vinnur bikarkeppnina í Sviss. Óðinn Þór hefur tvisvar unnið bikarinn með liðinu, Aðalsteinn Eyjólfsson þjálfari einu sinni, árið 2021, og Björgvin Páll Gústavsson fyrir 14 árum.