Óðinn Þór Ríkharðsson landsliðsmaður í handknattleik og samherjar hans í Kadetten Schaffhausen jöfnuðu í dag metin í úrslitarimmunni við HC Kriens um svissneska meistaratitilinn í handknattleik karla. Óðinn Þór skoraði sigurmarkið úr vítakasti þremur og hálfri mínútu fyrir leikslok, 30:29.
Mikill darraðardans var á síðustu mínútum leiksins þegar leikmenn Kriens freistuðu þess að ná a.m.k. í framlengingu en leikmönnum Kadetten lánaðist að halda fengnum hlut í heimsókn sinni í Kriens Krauerhalle.
Óðinn Þór skoraði alls sex mörk í leiknum, eitt þeirra úr vítakasti, þ.e. markið dýrmæta í lokin.
HC Kriens var með tveggja marka forskot að loknum fyrri hálfleik, 18:16.
Liðin hafa þar með einn vinning og mætast næst á sunnudaginn í Schaffhausen. Vinna þarf þrjár viðureignir til þess að verða meistari. Kadetten á titil að verja.
